‘सार्क ट्यांक सिजन–२’ दसैंपछि प्रसारण हुँदै

काठमाडौं । हिमालय टेलिभिजनबाट प्रसारण हुँदै आएको चर्चित व्यवसायिक रियालिटी शो ‘सार्क ट्यांक नेपाल’को दोस्रो सिजन आगामी दसैंलगत्तै प्रसारणमा आउने भएको छ। शोको दोस्रो सिजन पहिलो सिजनको तुलनामा थप विस्तार र नयाँ व्यवसायिक अवधारणासहित तयार गरिएको आयोजकले जनाएको छ।

सिजन–२ को औपचारिक घोषणा गर्न सोमबार काठमाडौंस्थित होटल एभरेस्टमा आयोजित पत्रकार सम्मेलनमा हिमालय टेलिभिजनका अध्यक्ष तथा प्रबन्ध निर्देशक धर्मराज भुसालले दोस्रो सिजनमा व्यवसायिक कारोबार तथा पिचको आकार बढेको जानकारी दिए। उनका अनुसार पहिलो सिजनको तुलनामा दोस्रो सिजनमा व्यापारको आकार करिब ६० देखि ६५ प्रतिशतले बढेको छ।

भुसालले दोस्रो सिजनमा सहभागी व्यवसाय तथा पिचरको प्रस्तुति, स्टोरी टेलिङ र व्यवसायिक मूल्यांकनमा समेत थप परिपक्वता देखिएको बताए। उनका अनुसार यसपटक करिब ६० देखि ६५ जना पिचरले शोमा आफ्नो व्यवसायिक अवधारणा तथा योजना प्रस्तुत गरेका छन्।

‘सार्क ट्यांक नेपाल’को दोस्रो सिजन हिमालय टेलिभिजनमा हरेक साता दुईवटा एपिसोड प्रसारण हुने जनाइएको छ। कार्यक्रम राति ८ बजे प्रसारण हुनेछ भने करिब साढे दुई महिनामा दोस्रो सिजन पूरा हुने बताइएको छ। दोस्रो सिजनको प्रसारण सुरु भएसँगै तेस्रो सिजनको तयारी पनि अघि बढाउने हिमालय टेलिभिजनको योजना छ।

हिमालय टेलिभिजनका कार्यकारी निर्देशक श्याम कँडेलले चार वर्षअघि नेपालमा ‘सार्क ट्यांक’ ल्याउने योजना बनाउँदाको समय सम्झँदै कार्यक्रमले छोटो अवधिमै उल्लेखनीय दर्शक तथा व्यवसायिक पहुँच बनाएको बताए। उनका अनुसार कार्यक्रम नेपालमा मात्र नभई विदेशमा रहेका नेपाली तथा अन्य दर्शकमाझ पनि पुगेको छ।

कँडेलका अनुसार दोस्रो सिजनमा करिब ६० करोड रुपैयाँ बराबरको डिल भएको छ। यसले कार्यक्रममा सहभागी व्यवसाय र लगानीकर्ताबीचको सम्बन्धलाई थप फराकिलो बनाएको उनको भनाइ छ। दोस्रो सिजनसँग आबद्ध विभिन्न कम्पनी र हिमालय टेलिभिजनबीच प्रायोजनसम्बन्धी सम्झौतासमेत कार्यक्रममा हस्ताक्षर गरिएको थियो।

दोस्रो सिजनमा पहिलो सिजनकै पाँच जना ‘सार्क’ अर्थात् लगानीकर्ताहरू निरन्तर रहने भएका छन्। निम्बस ग्रुपका प्रबन्ध निर्देशक आनन्द बगारिया, अग्नि ग्रुपका सहसंस्थापक तथा अध्यक्ष क्याबिनेट श्रेष्ठ, पद्मज्योति ग्रुपका लगानीकर्ता तथा स्याकार ट्रेडिङ कम्पनीका अध्यक्ष सौरभ ज्योति, वैद्यज अर्गनाइजेसन अफ इन्डस्ट्रिज एन्ड ट्रेडिङ हाउसेजकी प्रबन्ध निर्देशक ऋतुसिंह वैद्य तथा आईएमई ग्रुपका सहसंस्थापक तथा प्रबन्ध निर्देशक हेमराज ढकाल दोस्रो सिजनमा पनि लगानीकर्ता तथा निर्णायकको भूमिकामा देखिनेछन्।

कार्यक्रममा लगानीकर्ता आनन्द बगारियाले पहिलो सिजनमा नयाँ अनुभव भएका कारण आफूहरू केही नर्भस भएको स्मरण गरे। व्यवसायिक प्रस्तावको मूल्यांकन गर्ने अभ्यास र टेलिभिजनमा निर्णय गर्ने अनुभव फरक भएकाले सुरुवाती चरणमा केही असहजता भएको उनले बताए। तर दोस्रो सिजनसम्म आइपुग्दा कार्यक्रमसँग जोडिएका सबै पक्षमा अनुभव र परिपक्वता बढेको उनको भनाइ थियो।

बगारियाले दोस्रो सिजनपछि ‘सार्क ट्यांक’लाई व्यवसायिक तथा आर्थिक क्षेत्रमा प्रभाव पार्ने प्लेटफर्मका रूपमा हेर्न थालेको बताए। नयाँ व्यवसायिक सोच, लगानी र उद्यमशीलतालाई जोड्ने माध्यमका रूपमा कार्यक्रम अघि बढिरहेको उनको भनाइ थियो।

अग्नि ग्रुपका सहसंस्थापक तथा अध्यक्ष क्याबिनेट श्रेष्ठले पनि दोस्रो सिजनमा विभिन्न किसिमका व्यवसायिक अवधारणा सुन्न पाएको अनुभव सुनाए। उनका अनुसार कार्यक्रममा नयाँ पुस्ताका उद्यमीले प्रस्तुत गरेका व्यवसायिक मोडेलले नयाँ सम्भावना देखाएको छ। उनले विशेषगरी कम उमेरमै व्यवसायिक सोच विकास गरेका युवाका प्रस्तावले आफूलाई प्रभावित बनाएको बताए।

स्याकार ट्रेडिङ कम्पनीका अध्यक्ष सौरभ ज्योतिले पहिलो सिजनमा नेपालमा यस्तो कार्यक्रम ल्याउनु आफैंमा नयाँ प्रयास भएको बताए। उनका अनुसार दोस्रो सिजनसम्म आइपुग्दा यसको प्रभाव र सम्भावना थप देखिन थालेको छ। उनले ‘सार्क ट्यांक’लाई केवल टेलिभिजन कार्यक्रमका रूपमा मात्र नभई उद्यमशीलता र व्यवसायिक सोचलाई प्रोत्साहन गर्ने प्लेटफर्मका रूपमा व्याख्या गरे।

ऋतुसिंह वैद्यले नयाँ व्यवसायिक मोडेल तथा अवधारणाको मूल्यांकन गर्ने अवसरले आफूलाई पनि फरक अनुभव दिएको बताइन्। उनका अनुसार कार्यक्रममार्फत नयाँ व्यवसाय सुरु गर्न चाहने तथा आफ्नो व्यवसाय विस्तार गर्न खोजिरहेका व्यक्तिले लगानीकर्ता र बजारसम्बन्धी दृष्टिकोण बुझ्ने अवसर पाएका छन्।

आईएमई ग्रुपका सहसंस्थापक तथा प्रबन्ध निर्देशक हेमराज ढकालले पहिलो सिजनमा निर्णय गर्ने भूमिकामा बस्दा नयाँ अनुभव भएको बताए। उनका अनुसार पहिलो सिजनले उद्यमीहरूलाई व्यवसाय सुरु गर्न आशा, विश्वास र नयाँ आइडिया प्रस्तुत गर्ने अवसर दिएको थियो। दोस्रो सिजनमा त्यही अनुभवका आधारमा कार्यक्रम थप व्यवस्थित र विस्तार भएको उनको भनाइ छ।

‘सार्क ट्यांक नेपाल’को अवधारणा व्यवसायी तथा लगानीकर्तासामु आफ्नो व्यवसायिक योजना प्रस्तुत गर्ने र सम्भावित लगानीका लागि अवसर खोज्ने प्लेटफर्मका रूपमा अघि बढेको छ। कार्यक्रममा सहभागी पिचरहरूले आफ्नो व्यवसाय, उत्पादन, सेवा, बजारको सम्भावना तथा लगानीसम्बन्धी योजना लगानीकर्तासामु प्रस्तुत गर्नेछन्।

दोस्रो सिजनमा करिब ६० देखि ६५ पिचर सहभागी हुनुका साथै करिब ६० करोड रुपैयाँ बराबरको डिल भएको जानकारीले कार्यक्रमको व्यवसायिक पक्षलाई पनि थप चर्चामा ल्याएको छ। यद्यपि विभिन्न डिलको प्रकृति, लगानीको संरचना र सम्झौताका विस्तृत विवरण सम्बन्धित पक्षअनुसार फरक हुन सक्नेछन्।

दसैंलगत्तै प्रसारणमा आउने तयारीमा रहेको ‘सार्क ट्यांक नेपाल सिजन–२’ सातामा दुई दिन राति ८ बजे हिमालय टेलिभिजनमा प्रसारण हुनेछ। करिब साढे दुई महिनासम्म चल्ने दोस्रो सिजनसँगै तेस्रो सिजनको तयारी पनि अघि बढाउने टेलिभिजनले जनाएको छ। यससँगै नेपालमा उद्यमशीलता, स्टार्टअप र लगानीसम्बन्धी टेलिभिजन कार्यक्रमको रूपमा ‘सार्क ट्यांक’को यात्रा थप अगाडि बढ्ने भएको छ।