सुनको मूल्य ह्वात्तै बढ्यो, प्रतितोला २ लाख ९९ हजार रुपैयाँमा कारोबार

काठमाडौं। नेपाली बजारमा बुधबार सुनको मूल्य एक्कासि बढेको छ। नेपाल सुनचाँदी व्यवसायी महासंघका अनुसार आज सुनको मूल्य प्रतितोला ७ हजार २०० रुपैयाँले वृद्धि भएको हो। आज छापावाल सुन प्रतितोला २ लाख ९९ हजार रुपैयाँ मा कारोबार भइरहेको छ।

अघिल्लो कारोबार दिन सुन प्रतितोला २ लाख ९१ हजार ८०० रुपैयाँ मा कारोबार भएको थियो। अन्तर्राष्ट्रिय बजारमा देखिएको उतारचढाव, लगानीकर्ताको सुरक्षित सम्पत्तितर्फ बढ्दो आकर्षण तथा विनिमय दरको प्रभावका कारण नेपाली बजारमा पनि सुनको मूल्यमा उल्लेख्य वृद्धि देखिएको व्यवसायीहरूले बताएका छन्।

यससँगै चाँदीको मूल्यमा पनि सामान्य वृद्धि भएको छ। महासंघका अनुसार आज चाँदी प्रतितोला ४ हजार ८६० रुपैयाँ हाराहारीमा कारोबार भइरहेको छ।

हालको मूल्यवृद्धिसँगै नेपाली बजारमा सुनको मूल्य पुनः ३ लाख रुपैयाँ नजिक पुगेको छ, जसले लगानीकर्ता र सर्वसाधारण खरिदकर्ताबीच चासो बढाएको छ। विशेषगरी विवाह सिजन नजिकिँदै जाँदा यसको प्रत्यक्ष असर गहना बजारमा पर्ने देखिएको छ।

व्यवसायीहरूका अनुसार अन्तर्राष्ट्रिय बजारमा सुनप्रतिको माग बढ्दा नेपाली बजारमा पनि दैनिक मूल्यमा तीव्र उतारचढाव देखिन थालेको छ। आगामी दिनमा विश्व बजारको अवस्था, अमेरिकी डलरको चाल र भू-राजनीतिक घटनाक्रमले सुनको मूल्यलाई थप प्रभावित गर्न सक्ने अनुमान गरिएको छ।