वर्ल्डलिंक ‘सिक्सजी’ इन्टरनेट घोषणा, नयाँ पुस्ताको कनेक्टिभिटी अनुभव सार्वजनिक

नेपालको सबैभन्दा ठूलो इन्टरनेट सेवा प्रदायक वर्ल्डलिंक कम्युनिकेसन्सले आइतबार राजधानीमा आयोजित विशेष कार्यक्रममा नयाँ पुस्ताको इन्टरनेट प्रविधि ‘वर्ल्डलिंक सिक्सजी’ सार्वजनिक गरेको छ। कम्पनीले यसलाई भविष्यको इन्टरनेट संरचनातर्फको छलाङका रूपमा व्याख्या गरेको छ।

नयाँ प्रविधिले घर–कार्यालय, उद्योग, गेमिङ, स्ट्रिमिङ र स्मार्ट उपकरणहरूको कनेक्टिभिटीलाई वर्तमान स्तरभन्दा व्यापक र भरपर्दो बनाउने कम्पनीको भनाइ छ। वर्ल्डलिंकका अनुसार ‘सिक्सजी’ ले हाल प्रचलित वाई–फाई फाइभको तुलनामा झण्डै ४० प्रतिशत बढी कभरेज तथा चार गुणासम्म उच्च थ्रुपुट उपलब्ध गराउनेछ।

कार्यक्रममा कम्पनीका प्राविधिक टोलीले देखाएको डेमोमा इन्टरनेटको स्थिरता, दायरा र बहु-उपकरण क्षमतामा उल्लेख्य सुधार देखिएको बताइएको छ। सेवाप्रदायकका प्रतिनिधिहरूले नयाँ प्रणालीले ग्रामीण क्षेत्रदेखि शहरी डिजिटल व्यवसायसम्मलाई प्रभाव पार्ने ‘नेक्स्ट–जेनेरेसन नेटवर्क’ को आधार तयार गर्ने दाबी गरे।

उपभोक्ताले छिट्टै देशभर चरणबद्ध रूपमा ‘सिक्सजी’ आधारित सेवा पाउने संकेत दिँदै वर्ल्डलिंकले डिजिटल ट्रान्सफर्मेसनको अर्को अध्याय सुरु भएको घोषणा गरेको छ।